27. apreļs – Latgolys kongresa dīna Rēzeknē

Ilga Šuplinska | 2026.04.16

Jau ūtrū godu Latgolys kongresa dīnys pasuokumi nūteik Rēzeknē. Itūreiz byus vareiba pīsadaleit navaļstiskūs organizaceju i Ministru kabineta izbraukuma Memoranda padūmis sanuoksmē, rysynojūt Latgolys atteisteibai svareigus vaicuojumus, vydsškolānim pīsadaleit patriotiskā izalauzšonys spēlē “Kroma kolna boguoteibys” Ondrupinis pogosta Kroma kolnā, taipoš vysim sasatikt guojīnī pa Rēzekni i atceris pasuokumā pi Latgolys Mārys.

“Latgolys kongresa dīnā ir vareiba apsastuot i pasavērt, kas goda laikā ir padareits i kas doroms iz prīšku. Tei ir vīna nu ratūs svātku šaļteņu, kas nav dūmuota bolvu sadalei, kulturys i izgleieteibys apvuoršņa īzeimiešonai, bet dīna, kurā līkam golvys kūpā, lai apjaustu sovu vareišonu i navareibu Latgloys atteisteibā sevkurā jūmā, tok vysvaira cylvāka labbyuteibā i drūšeibā, dzeivojūt Eiropys uorejuo austrumu rūbeža tyvumā, “ uzsver Latgolys kongresa lamumu izpiļdis padūmis prīšksādātuojs Agris Bitāns.

Raksts turpinās pēc reklāmas

Informācija tirgotājiem - Simjūda tirgus

Aicinām tirgotājus pieteikties Simjūda tirgum Valmierā, kas norisināsies 10. oktobrī. Pieteikšanās līdz 30. augustam.

Valmieras novada Tūrisma pārvalde

Vydejuos izgleiteibys pūsma puorstuovi – Dagdys, Maltys, Kaunatys vydsškolu i Preiļu Juoņa Egleiša gimnazejis – jau nu poša reita bīdreibys “Kroma kolna bruoliste” vadeibā ruodeis sovys prasmis komandys i individualūs puorbaudejumūs Kroma kolnā, kab aplīcynuotu, ka ir tikpat izveiceigi, vīnuoti i seiksti, kaidi bejuši myusu seņči, apsazynojūt, ka dzeivoj iz rūbeža i sevkuru šaļtenu var pasamaineit breivuos dzeivis situaceja. Vydsškolānus sagaideisim Rēzeknē, gūdynojūt Latgolys kongresa dīnu i jūs pošu veikumu.

Navaļstiskuo sektora puorstuovi, uzjiemieji i sevkurs, kuram ir, kū saceit Latgolys drūšeibys, sabīdreibys nūtureibys, ekonomiskuos atteisteibys, inovaceju pīsaistis i medeju telpys vaicuojumā, gaideiti iz NVO i MK Memoranda padūmis izbraukuma sanuoksmi i daleibu dorba grupuos Rēzeknis nūvoda dūmē. Tī gon ir īprīškeja pīsateikšona da 22. apreļa: https://forms.gle/9orrgH7mMWiwuBR67

Vysi interesenti aicynuoti pīsavīnuot svātku guojīņam nu pīminis vītys “Latgolys kongresam 100” (13:30) da pīminekļa Latgolys Mārai, kur nūtiks atceris pasuokums, gūdynojūt seņčus, kas beja Latvejis vaļstiskuma idejis nesieji i tūs, kas tū daries nuokūtnē – patriotiskuos izalauzšanuos spēlis “Kroma kolna boguoteibys” dalinīkus. 
Pyrma tuo vēļ var paspēt nūsaklauseit viesturnīka Henriha Soma lekceju par Latgolys kongresa nūzeimi Latgolys Kulturviesturis muzejā.

Zīdus, kai īrosts, veļteisim ari Latgolys dareituojim, kuru pīminis vītys ir Atbreivuošonys alejā voi tīpat natuoli apleicīnē: Fraņčam Trasunam, Nikodemam Rancānam, Fraņčam Kempam, Valerijai Seilei, Vladislavam Luočam i Ontonam Kūkuojam.

Latgolys kongresa dīnys pasuokumu programa dalykumā. Pasuokumi nūteik ar Rēzeknis nūvoda dūmis, Rēzeknis vaļstspiļsātys Kulturys i turisma puorvaļdis i Saeimys Latgolys apakškomisejis, Latgolys kongresa lāmumu iziļdis padūmis, Zemissardzis 3. Latgolys brigadis  atbolstu. 
Pasuokumu organizej Latgalīšu kulturys bīdreiba sadarbeibā ar Rēzeknis nūvoda dūmi, Latvejis Pilsūniskū aliansi i Vaļsts kancelejis puorstuovim.

Ka ir vaicuojumi, zvoni: 26451355.